أيام‏...‏ بلا فضيلة‏!‏

أيام‏...‏ بلا فضيلة‏!‏
تحقيــــق الســــبت كتب : عـزت السـعدني


كل شئ موجود‏..‏ كل شئ مباح بس انت شاور بإصبعك‏!‏‏*‏ أيها السادة‏..‏ الشارع المصري اصبح شارعا بلا ضابط وبلا رابط‏..‏ اصبح شارعا بلا فضيلة‏..‏ واذا لم تصدقوا تعالوا معي لنري ماحدث‏!*‏

من زهقي وقرفي من أفلام الانفلات الأخلاقي المقررة علينا هذه الأيام‏..‏ خرجت لأجلس خلال دقائق الاستراحة في إحدي دور السينما داخل مول كبير آخر فخفخة وآخر شياكة‏..‏ أخلو لنفسي مع فنجان من القهوة المضبوط لكي أهدأ قليلا بعد مشاهد عارية قبيحة مقززة‏..‏ ما أنزل الله بها من سلطان‏..‏ في افلام آخر الزمان‏!‏
كان الضوء خافتا يادوب الواحد شايف الجرسون بالعافية
جاء فنجان القهوة‏..‏ ومعه بدأت البسبسة وهي كلمة مفردها بس‏..‏ أو بسبس وقد تضاف إليها إذا لم تسمع‏:‏ انت‏..‏ يا هس‏!,,‏ بكسر الهاء وسكون السين‏..‏
نظرت حولي فلم أجل إلا شخصي المتواضع‏..‏ ونظرت ودققت أكثر إلي مصدر البسبسة فإذا هي قادمة من فتاة رشيقة تضع ساق فوق ساق‏,‏ وتدخن سيجارة من داخل مبسم طويل‏..‏ لم أتبين ملامحها ساعتها‏..‏
تركتها تبسبس وتدخن وقلت في نفسي ياواد دي بتنده علي واحد زيها من سنها‏..‏ جوزها‏..‏ أخوها‏..‏ صاحبها الجو بتاعها‏..‏ ما افتكرش أكون أنا‏..‏ وقد بلغت من العمر ما بعد سن الشباب والشقاوة وقد ابيض الشعر مني واشتعل الرأس شيبا‏!‏
زادت البسبسة أكثر وأكثر‏..‏ واتبعها الغزال الشارد الذي يجلس في مقابلتي بكلمات‏:‏ انت‏..‏ انت‏..‏ أنا عاوزاك انت‏!‏
قبل ان أنطق أو حتي اتنفس كان الغزال الشارد قد وصل بخطوات رشيقة إلي مكاني وجلس واحتل الكرسي الملاصق لي وهي تقول‏:‏ يا خبر‏..‏ بقي أنا عاوزاك انت من الصبح‏..‏ ولا انت هنا‏!‏
ولأنني قد تعودت علي مثل هذه المواقف الغريبة والمفاجئة‏..‏ فقد قلت لها‏:‏ أهلا وسهلا‏..‏ أنا تحت أمرك‏!‏
قالت بدلال‏:‏ أنا اللي تحت أمرك‏!‏
قلت لها‏:‏ أمري في ايه بقي؟
قالت‏:‏ في اللي انت تأمر بيه‏!‏
قلت‏:‏ ازاي؟
قالت‏:‏ زي الناس الحلوين الطيبين
قلت وقد بدأت الغشاوة تنقشع من فوق عيني ورأسي رويدا رويدا‏:‏ قصدك‏!‏
قالت‏:‏ ايوة هو ده قصدي‏!‏
قلت لها‏:‏ يا ست هانم أنا عديت المرحلة دي من زمان‏..‏ وماليش في حاجات العبط دي‏!‏
قالت موش عاوزاكك تزعل‏..‏ أنا قلت ادردش معاك أفرفشك شوية بدل ما انت قاعد مكلضم كده‏!‏
قلت لها‏:‏ ياست الستات‏..‏ انت لسة حلوة ألف مين يتمناكي عروسه له‏..‏ أما انا تعديت السن واصبح الحال من المحال‏..‏ وتركت شقاوة الشباب من زمان‏.‏ ازاي بس نرجع نحب ونعشق‏..‏ في السن ده ونكتب جوابات ونبعت رسائل بالموبايل‏..‏ ونسهر الليل بطوله ونغير‏..‏ ونتخانق ونهجر بعض‏..‏ علي ايه ده كله‏..‏ الطيب أحسن أنا دلوقتي عندي أولاد وبنات في سنك؟
‏{{{{‏
فاجأتني السبنيورة بقولها‏:‏ ياسيدي ماتزقش أنا عارفة انك رجل كبارة ومقامك عالي وتلاقيك في منصب كبير وعندك رصيد في البنك‏..‏ موش كدة برضه‏..‏؟
قلت لها لأساريرها في ملعوبها‏:‏ موش كدة بالضبط‏..‏ زي كدة‏!‏
قالت‏:‏ أنا هاخشي في الموضوع علي طول‏..‏ أصل مافيش وقت قبل الفيلم ما يبتدي بعد الاستراحة‏..‏
من غير ما اعرف اسم سعادتك‏..‏ ولا انت عرفت اسمي‏..‏ انا ياسيدي خريجة معهد تكنولوجيا بعد الثانوية العامة باربع سنين سميه ليسانس سميه بكالوريوس زي ما تحب‏..‏ وانا عندي دلوقتي قول ثمانية وعشرين سنة بالضبط في يناير اللي الجاي‏..‏ وباشتغل في شركة توزيع لأفلام السينما والمسلسلات‏..‏ وباخد مرتب كويس‏..‏
وأنا علي فكرة كنت متجوزة راجل عربي صرف عليا دم قلبه وسافر مرجعش ثاني‏..‏ وماعنديش أولاد‏..‏ وأمي تعيش انت يجيي من خمس شهور‏..‏ يعني مقطوعة من شجرة‏..‏ وعندي شقة ثلاث مطارح تشرح القلب في الدقي‏..‏ بتاعتي وباسمي‏..‏
قلت لها مقاطعا‏:‏ وأنا مالي ياستي بكل ده ؟
قالت‏:‏ انت باين عليك راجل طيب وأمير الأمراء‏..‏ وأنا واحدة ست غلبانة ومنكسرة وطيبة والله العظيم‏..‏
قلت لها‏:‏ ياستي وانا مالي بالموال ده كله؟
قالت‏:‏ حااقولك ايه بس‏..‏ انا عندي فكرة بس ماتقولش لا‏..‏
قلت لها‏:‏ فكرة ايه بالصلاة علي النبي؟
قالت‏:‏ ما تفكر كدة تفرفشلك سنة ولا سنتين؟
قلت‏:‏ ما انا مفرفش اهو واخر مزاج‏..‏ ومافيش أجمل من كدة‏!‏
قالت‏:‏ لسة ما فهمتنيش ياحضرة‏!‏
قلت‏:‏ فهميني يا غزالة البر؟
قالت‏:‏ أنا وأنت نضرب لنا ورقتين جواز عرفي‏..‏ وتيجي تعيش معايا‏..‏ في الحلال طبعا‏..‏ أصل اللي زيك كده مايحبوش يعيشوا إلا في الحلال‏..‏ لأنهم مايحبوش يغضبوا ربنا‏..‏ زيي كده أحب كل حاجة في الحلال؟
قلت لها‏:‏ كده من الباب للطاق‏..‏ تتجوزيني كده من غير ما تعرفيني‏..‏ يمكن أنا راجل عندي مرض خطير واعديكي‏..‏ أو أكون نصاب وأضحك عليكي‏..‏ أو يمكن زعيم عصابة وشيخ منصر ادخلك في سين وجيم‏..‏ واللا تاجر مخدرات وادخلك معايا في العصابة‏..‏ ويكون مصيرك في الآخر تأبيدة في سجن النساء؟
انتفضت من مكانها كأن عقربا أسود قد لدغها وهي تقول لي‏:‏ بقي لا ده عاجبك ولا ده عاجبك‏..‏ انت مالكش في الطيب نصيب‏..‏ ياراجل فوق وشوف انت عايش في آخر عصر‏..‏ الحق نفسك‏..‏ وبص لي كويس كده قبل القطر ما يفوتك‏!‏
راحت تلف وتدور حول نفسها لكي أشاهد جسمها الغض البض وقوامها الفتان‏.‏
لم أجد علي لساني ما أقوله لها‏..‏ توقف بندول عقلي عن الدوران‏..‏ وتملكتني حيرة ما بعدها حيرة‏..‏ وأصابني عطب مفاجئ في صوتي‏..‏ وهي واقفة حائرة في انتظار ما أقوله‏..‏
ولم ينقذني من الموقف الغريب الذي لم أتوقعه أبدا‏..‏ ولم أرسم له سيناريو في حياتي يوما إلا حفيدتي سالي ـ ذات السبع سنوات ــ التي وجدتها فجأة أمامي‏..‏ فقد تركت مقعدها في السينما مع زوجتي ــ جدتها ــ لكي تبحث عني كما تفعل دائما عندما لاتجدني إلي جوارها‏..‏
احتضنتني بشدة وقالت لي‏:‏ إيه ياعزت‏..‏ إنت سبتنا ورحت فين؟
‏**‏ ملحوظة‏:‏ حفيدتي سالي وحفيدي محمد ينادياني باسمي مباشرة باعتبارنا في مرحلة سنية واحدة‏!‏
نظرت إلي النمرة الصيادة الشرسة بحنق شديد واستدارت تمصمص بشفتيها وهي تشير إلي حفيدتي وتقول‏:‏ حكم‏..‏ حكم ــ بكسر الحاء وفتح الكاف ــ خليها تنفعك‏!‏
ثم ابتلعتها الظلمة‏..‏
سألتني حفيدتي‏:‏ مين دي ياعزت؟
قلت لها‏:‏ هي مين دي‏..‏ أنا ماشوفتش حد‏..‏ دي واحدة ست كانت معدية‏!‏
‏.......................‏
‏.......................‏
ثاني يوم حكيت لصديقي الدكتور أحمد عكاشة كبير أطباء علم النفس في العالم العربي كله‏..‏ حكاية البسبسة وقلت له‏:‏ أخشي ما أخشاه أن تصبح مصر بلد الدين والخلق القويم‏..‏ بلدا بلا فضيلة‏!‏
قال‏:‏ وهي لسه ياعم عزت ما أصبحتشي‏..‏ دي أصبحت وأصبحت وأصبحت‏..‏ وأنا عندي حكايات وروايات تشيب من هولها الولدان‏..‏ ولكن لأنني أمين علي أسرار مرضاي وزواري‏..‏ فلن أحكي لك ما شهدته وما سمعته‏..‏ ولكن أنظر إلي وجوه الناس علي محطة الأتوبيس أو في الشارع أو حتي في الغيط أو في مكاتب الموظفين‏..‏ ستري غضب الله علي الوجوه‏..‏ وجوه كئيبة مسودة من كثرة ما تحمله الاكتاف والصدور من هم وغم‏..‏
هم الأسعار اللي ولعت نار وبتشعلل يوم بعد يوم وما فيش حكومة تطفيها‏..!‏
قلت‏:‏ حكومتنا الالكترونية بتطفي نار الأسعار بالتصريحات الوردية علي لسان الوزراء‏..‏
البداية علي لسان رئيس الوزراء نفسه الذي أعلن‏:‏ الأسعار مزادتش ولا حاجة دي في حدود المعقول والسلع في متناول كل جيب‏!‏
ثم يلقي باللوم كله علي الحر اللعين‏!‏
ووزير التضامن ـ التموين سابقا ـ ومعه وزير المالية الشهير بوزير الجباية ومعهما وزير الاقتصاد‏..‏ كلهم يعلنون في كل يوم وفي كل مساء‏..‏ بشري للمواطنين كيلو اللحم عند الجزارين بـ‏60‏ جنيه بس‏..‏ وفي الجمعيات اللحم البرازيلي المستورد اللي قعد في عرض البحر شهورا بلا عدد‏..‏ الكيلو بـ‏30‏ جنيه الحق يا جدع خلي العيال ياكلوا ويهيصوا ويشبعوا ويكركعواودوغري تدور محركات السيارات المكيفة بهم في طريقهم إلي فيلاتهم علي الساحل الشمالي لتمضية أجازة آخر الأسبوع‏!‏
أنا هنا أيها السادة لا أفتري علي أحد فهذه هي الحقيقة‏..‏ حتي أصبح الغلابة دفه منا وهم يمثلون أكثر من ثلث المصريين يحسبون مرتباتهم ليس بالجنيه ولكن بكيلو اللحم فلان مرتبه ثلاثة كيلو يعني‏180‏ جنيه في الشهر‏..‏ وبلاش بقي حديث الغم والهم‏..‏ واحنا في عز موسم المدارس والمصاريف واللبس والشنط والدروس الخصوصية‏!‏
قال لي صديقي أكبر عالم علم نفس في نصف الكرة الجنوبي‏:‏ كفاية كدة النهاردة خليني أشوف العيانين اللي عندي‏!‏
‏........‏
‏........‏
نزلت من عند العالم الجنتلمان الدكتور أحمد عكاشه‏..‏ لم أجد عربيتي ولا سائقي ـ كما هي العادة ـ شاورت لتاكسي عجوز‏..‏ من أيام سينما الأبيض والاسود‏..‏ جلست إلي جوار السائق وأنا أرغي وأزيد‏..‏ يعني قرفان آخر قرف وزهقان آخر زهق‏..‏
سألني السائق الظريف‏:‏ مالك؟
قلت‏:‏ ما فيش‏!‏
قال‏:‏ لا في حاجة؟
قلت‏:‏ حاجات‏!‏
قال‏:‏ الحاجات كتير‏..‏
قلت‏:‏ تصور يا أبو خالو‏:‏ بنت زي القمر عاوزاني أنا اللي في سن أبوها‏..‏ أتجوزها بورقة شهرين ثلاثة‏..‏ وبعدها كل واحد يروح لحاله‏.‏
قال‏:‏ دي لعبة وبيلعبوها البنات والستات اليومين دول عشان تمص دمك وتطير منك فلوس المعاش والمكافأة وتأمن لها مستقبلها‏..!!‏
لكن اتجوزتها ولا لا‏!‏
قلت‏:‏ أتجوز مين يابا؟
قال‏:‏ انت أحسن مني‏..‏ أنا أصبحت بين يوم وليلة أب لمولود‏..‏ لا شفت أمه ولا اتجوزت ولا اتنيلت علي عيني‏!‏
أسأله‏:‏ إزاي يا عمنا؟
قبل أن يجيب‏..‏ قلت له‏:‏ ما تيجي يا راجل تاخدلك واحدة شيشة عجمي محترمة علي القهوة اللي علي الناصية‏..‏ ونتكلم كلمتين واهو العداد بيعد؟
قال‏:‏ وحياتك تعبان وخزمان بس موش قادر أقف عشان عاوز أكمل قسط العربية‏!‏
جلسنا نتبادل حديثا كله ود وصفاء‏..‏ ومع أول نفس من الشيشة العجمي‏..‏ فتح لي عم عبد الفتاح قلبه وصدره‏..‏ قال‏:‏ كان الوقت في نحو العاشرة مساء‏..‏ عندما قفز صبي صغير يقترب من العاشرة من عمره عند مدخل شارع الترعة البولاقية في شبرا وقال لي‏:‏ والنبي أختي جالها الطلق وهتولد الليلة دي‏..‏ تعمل فينا معروف وتوصلنا لحد مستشفي التأمين في المؤسسة؟
ووقفت ـ وركنت علي جنب وانتظرت حتي جاءت أخته بحملها تستند علي ذراع أمها‏..‏ ونزلت من مقعدي وساعدتها علي ركوب السيارة هي وأمها‏...‏ والغلام إلي جواري‏..‏ وذهبنا طيران إلي مستشفي التأمين ودخلت قسم الولادة‏..‏ وأنا أنتظر في صالة الزوار‏..‏
مر الوقت بطيئا بطيئا‏..‏ في حوالي الواحدة من منتصف الليل جاءتني أمها لتطلب مني بطاقة الرقم القومي الخاص بي‏..‏
سألتها‏:‏ ليه يا أمي؟‏..‏
قالت‏:‏ أصلهم عاوزين ضامن عشان يضمنا في دفع الرسوم ومصاريف الولادة‏..‏ وفتح غرفة العمليات‏..‏ أصل بهيجة ـ ابنتها ـ ولدوها قيصرية‏!‏
بحسن نية أو من عبطي أعطيتها البطاقة‏.‏ وانتظرت حتي الرابعة فجرا‏..‏
خرجت إلي أمها بالبطاقة وقالت لي‏:‏ احنا سهرناك يا عمنا تقدر تروح دلوقتي وتجيلنا الساعة عشرة الصبح عشان تروحنا بالسلامة‏!‏
أعطتني خمسين جنيها وقالت لي‏:‏ بكره نتحاسب يا راجل يا طيب‏!‏
قلت له‏:‏ ورحت الصبح في الميعاد ما لقيتش حد‏..‏ لا البنت ولا أمها ولا المولود‏!‏
يشد نفسا عميقا من الشيشة العجمي وهو يقول‏:‏ بالضبط‏..‏
قلت‏:‏ وبعدين؟
قال‏:‏ وبعد ست أشهر ـ لقيت محضر من محكمة الأسرة بيخبط علي باب شقتي ويعلنني أنه لابد من دفع نفقة حموده ابني اللي عمره ست شهور‏..‏ واللي كتبوه باسمي‏..‏ ولا أنا شفت أمه ولا عاشرتها ولا حتي أعرف اسمها ايه‏!‏
اسأله‏:‏ ازاي بس كتبوه باسمك يا ناصح؟
قال‏:‏ موش أنا أديتهم أول مادخلنا المستشفي بطاقتي القومية‏!‏
قلت‏:‏ يعني ولد ابن حرام مسكين لقولوا أب‏!‏
قال‏:‏ باسمي‏..‏ من بطاقتي القومية ليلة الولادة‏..!‏
قلت‏:‏ يعني هما كانوا بيدوروا علي أب للمولود‏..‏ وما لقوش غيرك يا عم عبد الفتاح‏!‏
قال‏:‏ هو أنا ناقص عيال دا أنا عندي في الدار خمس عيال في عين العدو وأمهم كمان‏!‏
‏........‏
‏........‏
يا عالم يا هوه يا أولي الألباب منا‏...‏ مصر تعيش الآن أياما بلا فضيلة‏..‏ فهل من منقذ ؟ ‏