يوميات موظفة من البيت للشغل للعيال للزوج طبعا...خليكي معانا

من طرف roidaa الثلاثاء يناير 12, 2010 1:43 pm

السلام عليكم ورحمة الله وبركاته

نقلت ده ليكم بصراحه عجبني جدا جدا ومفيد لكل مرأه خصوصا العاملات باذن
الله والله من وراء القصد وارجو اكمال تعليقاتكم لتعم الافاده ان شاء الله

حيث ان صناعه الحياه للمراه لابد ان تبدا من بيتها

اترككم مع ما نقلته لكم.....
..........
..........
ايه اخباركوا واخبار البيت معاكوا خلاص العيد خلص وراجعين الشغل بكرة وفيه مننا اللي رجعت النهاردة
عايزين كل يوم ندخل ونتكلم مع بعض ونقول يومياتنا وكل اللي عندها معلومة تفيدنا تقولها
ونتفق على حاجات نعملها مع بعض عشان نحافظ على بيتنا
والحاجات دي اللي هنتكلم عليها ونعملها مع بعض

-1البيت زي الفل دايما(اكنس بيتك ورشة ما تعرف مين يخشه)
2-الاعمال الاسبوعية
3-الاعمال الشهرية
4-تنظيم الوقت
5-عايزة اتعلم حاجة مفيدة
6-الاكل (اقرب طريق لقلب الراجل)
7-المواعين وازاي انضفها
8-العزومات (تعالي وهاقولك ازاي تتصرفي فيها)
9-جددي بيتك دايما
10-التدبير المنزلي والاقتصاد في المصروفات(تعالي نوفر مع بعض)
11-وانا روحت فين عايزة اهتم بنفسي من داخل المطبخ

كل الحاجات دي هنعملها مع بعض عشان اللي بتكسل تلاقي
حد يشجعها وكمان اللي بتسيب البيت لحد اما يتبهدل ليه كدة خليكي معانا
انتي كدة بتهلكي نفسك مع انك ممكن تخلي بيتك فل وبمجهود بسيط اوي
هاقولكم انا بقضي يومي ازاي وكل واحدة تقول بتعمل ايه من ساعة ماتقوم من نومها
صباح الفل
يلا بلاش كسل هاغسل وشي واتوضى واصلي اصل انا باصحى الفجر مقولكوش الصحيان
الفجر بيعمل ايه اليوم فعلا بيبقى فيه بركة وباعمل كل حاجة
بعد اما اصلي بحس اني بقيت 20واحدة مع بعض
باخد الغسيل اللي في الغسالة وانشره والم اللي متنشر واطبقه وفورا في الدولاب
واكوي هدومي وهدوم جوزي اللي هنروح بيها الشغل
واحضر الفطار ليهم واعمل سندوتشات للاولاد عشان الحضانة
وادخل على المطبخ انضف الحاجات اول باول ولو فيه حاجة اطلعها من الفريزر عشان الغدا لما ارجع باذن الله
وبالمكنسة اي حاجة في الارض

نسيت اقولكم بعد الصلاة بالعب شوية رياضة يعني من نص ساعة لساعة
ويوم الاتنين عندي حلقة حفظ قرآن هنا في المنتدى
وبلبس والبس ولادي وانزل اروح الشغل

لما ارجع من الشغل بقى (شوفتو رجعت بسرعة ازاي)

اغير هدومي وطبعا على المطبخ اجهز الاكل والمواعين بتكون اول باول

ونتغدا وطبعا المواعين والمطبخ اطلع منه زي الفل وريحته روعة
(هقولكو ازاي متستعجلوش كل حاجة في وقتها)

متنسوش الصلاة على وقتها والله ربنا هباركلك في وقتك وخصوصا العصر سيبي اي
حاجة بتعمليها وصلي وشوفي بعد كدة الحاجة اللي انتي سبتيها هي اللي
خلصت(من ترك شيئا لله ابدله الله خيرا منه)

بدخل على النت شوية الك معاكوا والعب مع اولادي وبتعلم الخياطة والكروشية والتريكو كمان وساعات باعمل حاجات للشغل على الكمبيوتر
ولما جوزي بيجي في اي وقت لازم اسيب الحاجات واقعد معاه طبعا
ده اليوم العادي جدا ليا
وعشان ماطولش عليكوا كل شوية هاقول على حاجة من الحاجات اللي هنعملها
يلا بقى كل واحدة تدخل وناوية تكون معانا تكتب هي بتعمل ايه

من طرف roidaa الثلاثاء يناير 12, 2010 1:46 pm

نتكلم بقى عن اول حاجة رقم واحد
نضافة البيت اخترت التوقيت ده عشان احنا طبعا اتهدينا في الترويق كأننا مش
بنروق غير في الاعياد والمناسبات وطبعا بنخلص بعد الماتش ده
مش قادرة تقومي ورجلك بتوجعك وضهرك رغم ان البيت المفروض يكون تضيف دايما
افرضي حد جالك فجأة هتعملي ايه هتوقفيه على الباب لحد اما تروقي
حماتك طبت عليكي تقول ايه اخت جوزك او حتى صحبتك اكيد هتبقي مكسوفة محدش يحب حد يشوف بيته مش نضيف
فيه ناس كسلانة شوية او محتاجة حد يشجعها ماشاءالله هنا في المنتدى صحبة جميلة ليه مانشجعش بعض
بصي ياستي تعالي نتفق على نظام نمشي عليه واللي عندها اضافة تتفضل
فيه حاجات لازم ولابد وضروري تتعمل كل يوم زي ايه
اقولك زي ايه
اولهم ومشكلة ناس كتير بتضايق منها وهي المواعين
نشوف المواعين لما بتتكوم ايه اللي بيحصل اولا ريحة المطبخ بتبقى مش تمام وبصراحة كدة بتبفى مقرفة
الصراصير وما ادراكي ما الصراصير انا عندي صرصير من الشقة اللي فوقي هيجنوني
بتنزل لما افتح الشباك وطبعا لازم انضف واخر ما زهقت عملت سلك على الشبابيك
بس مجرد شكلها كان بيقرف ولازم تغسلي الحاجة كل شوية بس الحمدلله جربت العجينة بتاعت الصراصير وراحو
شكل المواعين في الحوض والمية كل اما تفتحي الحنفية بتتجمع والدهون منظر وحش جدا
نعمل ايه بقى بصي الحاجة اللي تخلصيها اغسليها على طول متخليش حاجة في الحوض
طول مانتي واقفه بتطبخي خللي حوضك نضيف
خللي دايما العلبة اللي بتحطي فيها الصابون مليانة اول ما تدخلي المطبخ
وياريت تخللي ليفة صغيرة للكوبيات وليفة للمواعين خليهم في الصابون ولما تخلصي خالص اغسليهم كويس وسيبيهم ينشفوا عشان ماتدوبش بسرعة
اول ما تدخلي المطبخ خللي جنب الباب مسمار وعلقي فيه مريلة المطبخ ودي هتكون اول حاجة المريلة
والمريلة مهمة جدا اولا عشان هدومك ما تتبهدلش وطبعا بقع الاكل صعبة وهتاخد وقت لما تنضف يبقى ليه من الاول البسي المريلة وخلصي نفسك
وهي بتحمي من اي خطر مثلا شوربة او طبيخ سخن يوقع عليكي
المية لما تغسلي المواعين عشان متتعبيش البقع
في الاول هتلقيها صعبة لكن لما تتعودي عليها مش هتقدري تستغني عنا
طبعا وانتي بتطبخي بتقلبي بمعلقة طب احطها فين لما اخلص تقليب هاتي طبق وحطي المعلقة ولما تخلصي اغسليهم
واوعي تحطي المعلقة اللي قلبتي بيها على السفرة او الطبلية اغسليها وحطيها
قطعتي حاجة بالسكينة خلصي واغسليها وشيليها
القطاعة اغسليها وشليها طبق غسلتي فيه الرز ولا اي حاجة خلصيه واغسليه وشليه
متخليش المكان مكركب جنبكلو الباسكت بتاع المطبخ بعيد عنك ممكن تحطي ادامك طبق تقشري التوم والبصل واي حاجة وترمي القشر بعد كدة وتغسليه
وبلاش الرمي في الحوض لحد اما تخلصي عشان مفيش اي حاجة تدخل الحوض وتسده
القماش اللي بنمسك بيه الحلل خلليه دايما نضيف بتغسل كل يوم وانا بقى عشان
مدعكهوش بعمل ايه اول اما اخلص واغرف اكون محضرة طبق كبير فيه مبة ومسحوق
ولو هي مش نضيفه اوي بحط كلور واسيبها لحا اما نخلص الاكل واغسل المواعين
واغسلها
وبعد اما اخلص طبعا البوتجاز لازم يتغسل والرخامة والحوض
والمطبخ يتكنس واقفل غطا الباسكت بتاع الزبالة واعلق المريلة واخرج من المطبخ
طبعا بكون حاطة صابون عشان اغسل ايدي ووشي ولو نص لمونة امسح ايدي بيها يبقى تمام اوي
لما بغسل الحوض بكلور بالبس جوانتي عشان ايدي رغم اني مش بحبه بس بجد بيحمي وبرضة هاتتعودي عليه
وده المطبخ والحاجات اللي لازم تتعمل كل يوم فيه

من طرف soso الثلاثاء يناير 12, 2010 2:07 pm

يومك جميل جدا والله فعلا لو كل واحدة تعمل كدة هترتاح اوي فعلا تقريبا بعمل زيك من الطبيخ والمواعين وكل دة وكمان المذاكرة ربنا بقا يعنا ويعينك وجزاكي الله كل خير

من طرف roidaa الثلاثاء يناير 12, 2010 2:09 pm

soso كتب:
يومك جميل جدا والله فعلا لو كل واحدة تعمل كدة هترتاح اوي فعلا تقريبا بعمل زيك من الطبيخ والمواعين وكل دة وكمان المذاكرة ربنا بقا يعنا ويعينك وجزاكي الله كل خير

الله يكرمك ياSOSO
بس علي فكره مش انا اللي باعمل كده انا نفسي ان شاء الله اعمل كده
والله المستعان بس ده انا نقلاه لتعم الافاده
باذن الله ولسه هاكمله....

من طرف roidaa الثلاثاء يناير 12, 2010 2:12 pm

نتكلم بقى عن اول حاجة رقم واحد
نضافة البيت اخترت التوقيت ده عشان احنا طبعا اتهدينا في الترويق كأننا مش
بنروق غير في الاعياد والمناسبات وطبعا بنخلص بعد الماتش ده
مش قادرة تقومي ورجلك بتوجعك وضهرك رغم ان البيت المفروض يكون تضيف دايما
افرضي حد جالك فجأة هتعملي ايه هتوقفيه على الباب لحد اما تروقي
حماتك طبت عليكي تقول ايه اخت جوزك او حتى صحبتك اكيد هتبقي مكسوفة محدش يحب حد يشوف بيته مش نضيف
فيه ناس كسلانة شوية او محتاجة حد يشجعها ماشاءالله هنا في المنتدى صحبة جميلة ليه مانشجعش بعض
بصي ياستي تعالي نتفق على نظام نمشي عليه واللي عندها اضافة تتفضل
فيه حاجات لازم ولابد وضروري تتعمل كل يوم زي ايه
اقولك زي ايه
اولهم ومشكلة ناس كتير بتضايق منها وهي المواعين
نشوف المواعين لما بتتكوم ايه اللي بيحصل اولا ريحة المطبخ بتبقى مش تمام وبصراحة كدة بتبفى مقرفة
الصراصير وما ادراكي ما الصراصير انا عندي صرصير من الشقة اللي فوقي هيجنوني
بتنزل لما افتح الشباك وطبعا لازم انضف واخر ما زهقت عملت سلك على الشبابيك
بس مجرد شكلها كان بيقرف ولازم تغسلي الحاجة كل شوية بس الحمدلله جربت العجينة بتاعت الصراصير وراحو
شكل المواعين في الحوض والمية كل اما تفتحي الحنفية بتتجمع والدهون منظر وحش جدا
نعمل ايه بقى بصي الحاجة اللي تخلصيها اغسليها على طول متخليش حاجة في الحوض
طول مانتي واقفه بتطبخي خللي حوضك نضيف
خللي دايما العلبة اللي بتحطي فيها الصابون مليانة اول ما تدخلي المطبخ
وياريت تخللي ليفة صغيرة للكوبيات وليفة للمواعين خليهم في الصابون ولما تخلصي خالص اغسليهم كويس وسيبيهم ينشفوا عشان ماتدوبش بسرعة
اول ما تدخلي المطبخ خللي جنب الباب مسمار وعلقي فيه مريلة المطبخ ودي هتكون اول حاجة المريلة
والمريلة مهمة جدا اولا عشان هدومك ما تتبهدلش وطبعا بقع الاكل صعبة وهتاخد وقت لما تنضف يبقى ليه من الاول البسي المريلة وخلصي نفسك
وهي بتحمي من اي خطر مثلا شوربة او طبيخ سخن يوقع عليكي
المية لما تغسلي المواعين عشان متتعبيش البقع
في الاول هتلقيها صعبة لكن لما تتعودي عليها مش هتقدري تستغني عنا
طبعا وانتي بتطبخي بتقلبي بمعلقة طب احطها فين لما اخلص تقليب هاتي طبق وحطي المعلقة ولما تخلصي اغسليهم
واوعي تحطي المعلقة اللي قلبتي بيها على السفرة او الطبلية اغسليها وحطيها
قطعتي حاجة بالسكينة خلصي واغسليها وشيليها
القطاعة اغسليها وشليها طبق غسلتي فيه الرز ولا اي حاجة خلصيه واغسليه وشليه
متخليش المكان مكركب جنبكلو الباسكت بتاع المطبخ بعيد عنك ممكن تحطي ادامك طبق تقشري التوم والبصل واي حاجة وترمي القشر بعد كدة وتغسليه
وبلاش الرمي في الحوض لحد اما تخلصي عشان مفيش اي حاجة تدخل الحوض وتسده
القماش اللي بنمسك بيه الحلل خلليه دايما نضيف بتغسل كل يوم وانا بقى عشان
مدعكهوش بعمل ايه اول اما اخلص واغرف اكون محضرة طبق كبير فيه مبة ومسحوق
ولو هي مش نضيفه اوي بحط كلور واسيبها لحا اما نخلص الاكل واغسل المواعين
واغسلها
وبعد اما اخلص طبعا البوتجاز لازم يتغسل والرخامة والحوض
والمطبخ يتكنس واقفل غطا الباسكت بتاع الزبالة واعلق المريلة واخرج من المطبخ
طبعا بكون حاطة صابون عشان اغسل ايدي ووشي ولو نص لمونة امسح ايدي بيها يبقى تمام اوي
لما بغسل الحوض بكلور بالبس جوانتي عشان ايدي رغم اني مش بحبه بس بجد بيحمي وبرضة هاتتعودي عليه
وده المطبخ والحاجات اللي لازم تتعمل كل يوم فيه

من طرف roidaa الثلاثاء يناير 12, 2010 2:15 pm

الحاجات بقى اللي برة المطبخ

السراير لازم تتروق بعد اما نقوم من النوم وافتح الشبابيك ةاهوي الفرشة
وبكون مخلصة الحاجات قبل اما انام يبقى واريا الغسيل احطه في الغسالة الم اللي متنشر وانشر التاني
وزي ما قولتلكم الرياضة وعلى فكرة اليوم اللي مش بعمل فيه رياضة بحس ان حركتي بطيئة
وبحاول اعمل كل حاجة قبل اما انزل اروح الشغل اغسل الكوبيات مكان اللبن واغسل الاطباق مكان الفطار
وبصراحة جربت اني اكوي مرة واحدة في الاسبوع وهي مريحة بس لما كنت بحطهم في الدولاب بيتكرمشوا وممكن كنت باكويهم تاني
وامسح الجزم قبل ما ننزل
وامشي والبيت نضيف والله ده بيريحني لما ارجع كفاية الراحة اللي بلقيها بعد الزحمة والدوشة والارهاق
البيت طبعا بيتكنس كذا مرة في اليوم
بانضف الحمام على الماشي كدة يعني الفرشة بتاعت الحمام بحط فيها كلور ومسحوق وادعك القاعدة وممكن بعد كل استخدام
او لما الاولاد يدخلوا
الحوض بتاع الحمام بحاول انزل الصابون من عليه وبس ده كل يوم
يلا كل واحدة تقول بتعمل ايه مش عايزين كسل عشان نتفق اللي هتصحى معايا الفجر والناس اللي هيصحوا بعد كدة يلا بقى

ويتبع ان شاء الله

من طرف هيام الثلاثاء يناير 12, 2010 2:20 pm

بجد موضوعك جميل وكنت محتاجه ليه لأني لسة متجوزة جديد وتعبانة من الشغل ومن البيت لأني مش عارفة أنظم نفسي شوفي النت واقع عندي في الشغل وداخلة من الموبيل أول مايتصلح هدخل إن شاء الله وأكيد هنتكلم كتير سلامي ليكي واتمني نكون أخوات في الله وأصحاب
أختك هيام

من طرف roidaa الثلاثاء يناير 12, 2010 2:27 pm

هيام كتب:
بجد موضوعك جميل وكنت محتاجه ليه لأني لسة متجوزة جديد وتعبانة من الشغل ومن البيت لأني مش عارفة أنظم نفسي شوفي النت واقع عندي في الشغل وداخلة من الموبيل أول مايتصلح هدخل إن شاء الله وأكيد هنتكلم كتير سلامي ليكي واتمني نكون أخوات في الله وأصحاب
أختك هيام

ربنا يبارك لك في بيتك الجديد ياهيام
علي فكره انا لسه زيك متجوزه جديد برضه وكان ده السبب اني ادور علي الموضوع ده
بسبب اللخبطه والتعب اللي في الاول ده بس الله المستعان
واهلا بيكي اخت لي في الله..

من طرف roidaa الثلاثاء يناير 12, 2010 2:27 pm

دي تكمله ما انقله لكم
...
....
اديني ودنك اقولك على شوية حاجات
خايفة ليه تعالي اقولك مش هاكل ودنك
فيه حاجات طبعا بتساعدني على انجاز شغل البيت والاكل

الصلصة
دي سر من اسراري لازم لما الطماطم ترخص وتكتر في السوق انزل اجيب منها كميات واضربها في الخلاط
واصفيها واسبكها يعني احط شوية زيت وملح واحط الصلصة واسبها تتسبك
ولما تبرد احطها في اكياس التلاجو وفي الفريزر
التوم
انا من اعداء التوم رغم اني مش بعمل حاجة من غيره بس مش بحب ريحته وكمان معنديش وقت افرش في الارض واقشر التوم

طب والمشكلة دي هحلها ازاي بقى لما التوم يطلع وهو لسة اخضر اجيبه(مش مشكلة بستحمل ريحته اهو يوم وخلاص)
واشيل الراس واحطه في الكبة واطحنه واعبيه في اكياس واجمع الاكياس واحطه في علبه
طب ليه علبة عشان الريحة طبعا وعلبة محكمة كمان
طب انا معنديش ديب فريزر ده بس بتاع التلاجة ومفيش مكان
ماشي حطيه في 4 او5 كياس وحطيه مش هيبقى فيه ريحة وانا بطلع الكيس وافضيه
في برطمان وبحطه في التلاجة جوا كيسين والبرطمان محكم وعلى فكرة جوزي
مشبعني عزومات يعني لازم ميبقاش فيه ريحة في التلاجة
وممكن في طريقه تانيه حلوه
التوم العادي تقشريه بسهوله برضه بانك تحطيه في ميه القشره هتخرج بسهوله
واللي قشرتيه تشيليه في الكيس في الفريزر علي طول لحين استخدامه
الخضار
بقى انا بانضف الخضار وفيه اللي بعمله بالبخار وفيه اللي بحطه زي ما هو يعني الكرنب او ورق العنب بحطه زي ما هو
البسلة والبامية والفاصوليا بعملها بالبخار وبعصر عليهم لمون وفي كيس وفي الفريزر طبعا
فيه حاجة مهمة احنا مش بنهتم بيها الشوربة
اللي فاضلة مننا وكتير مننا بيرمها طب ليه ممكن تحطيها في اكياس او علبة وفي الفريزر
ودي بقى هاعمل بيها ايه ممكن تطلعيها تعملي عليها لسان عصفور وممكن تضيفيها على الاكل او تسقي المحشي بيها او تعملي عليها شوربة خضار
شعارنا لازم يكون احنا مش بنهدر اي حاجة والنعمة دي لازم نحافظ عليها

برضة العيش
مش كلنا عندنا حد يجيب عيش ممكن تجيبي وتحطي في الفريزر في كيسة
وبلاش لما تطلعيه تسخنيه على طول خلليه لحد ما يفك لواحده طلعيه من الكيس
وافرديه وممكن يدوب على الشياطة على البوتجاز اوفي الميكرويف او الفرن
وممكن اوي يتاكل زي ماهو
لما بجيب اللحمة بقطها وبحطها في اكياس وفي الفريزر
البطاطس لما بترخص بجبها واقشرها واقطعها صوابع واقليها نص قليه واصفيها من الزيت وبرضة هي عارفة طريقها الكيس والفريزر
ودي الحاجات اللي بتساعد في الانجاز

من طرف مشمش الأحد يناير 24, 2010 6:33 pm

من طرف roidaa الإثنين يناير 25, 2010 9:51 am

مشمش كتب:

ويعافيك اخى الفاضل

من طرف roidaa الإثنين يناير 25, 2010 9:53 am

ودي خبره موظفه تانيه
أنا كمان موظفة
بس جوزي مسافر
يعني ولادي
هما اللي معايا دلوقتي
الشغل اللي بعمله وهما نايمين أكتر بكتير من وهما صاحيين
اللي بيأخرني بعد الشغل بودي إبني الصغير عند ماما ربنا يديها الصحة
وأرجع أخدة
وبعدين باكون مجهزة الأكل علي بيات
يدوب رز مكرونة تسخين للأكل
نتشطف أنا والولاد وأصلي
وبدين نتغدي
أشطب الحوض
وأحط المواعين في الصفاية اللي فوق الحوض
و أفتح لهم التليفزيون علي الأطفال
وأريح شوية
وأكون حطيت الهدوم في الغسالة
أصحي أتوضا وأصلي
وأنشر وإذا كان فيه غسيل أنشره
وأولع علي الأكل بتاع تاني يوم
بس عاده فيه أكل بعمله علي يومين
وبعدين أقعد مع إبني أحفظه القرآن
علشان فيه شيخ بيجيله اليت
فبحفظه الجديد
وأراجع علي اللي فات
كدا يومي علي السريع
بس لسه فيه تفاصيل تانيه

من طرف roidaa الإثنين يناير 25, 2010 9:56 am

نصائح عامة
التلاجة لازم تبقى نضيفة دايما طب ازاي ده الاكل كله فيها والعصاير وحاجات تانية كتير
هاقولك تعملي ايه
كل حاجة حطيها في علبة شوية اكل باقين ومش هترجعيهم في الحلة تاني كل حاجة
لازم تكون متغطية حتى لو معندكيش علب كفاية وهاتحطي في طبق غطي الطبق
بالنايلون وطبعا تحطي حتة فحمة في التلاجة عشان تمتص اي روايح وبعدين كل
يومين او تلاتة هاتي مية بكلور وقماشة وبليها واعصريها وامسحي مجرد مسح بس
هتلاقيها زي الفل ومش هتتعبك لما تغسليها وممكن تحطي فيها ماء ورد عشان
ريحتها تبقى ريحتها جميلة
ومن برة اغسليها برضة بالقماشة
وحطي على التلاجة من فوق مفرش او ورقة جرنان او اي حاجة عشان التراب ومش
كل شوية هتطلعي تنضفيها وممكن تحطي فازة او مثلا لو عندك ميزان بتاع الاكل
او البرطمان اللي بيحطوا فيه الحبوب للزينة هيعمل منظر
دي التلاجو خلصناها

من طرف roidaa الإثنين يناير 25, 2010 9:58 am

الغسالة الاتوماتك
طالما انتي موظفة دي لازم تكون عندك ولو مش موظفة ممكن اه وممكن لأ دي
نعمة انا في اول جوازي مجبتش غسالة عشان حصلت ظروف ومكنش معانا فلوس
وبعدين قولت حرام اجيب نص اتوماتيك وبعد كام شهر اجيب تاني اتوماتيك فكان
فيه غسالة قديمة عادية اخدتها بس كنت بتبهدل احلى بهدلة والحمدلله دلوقتي

المكنسة الكهربائية
برضة مهمة مش هينفع تكوني راجعة من الشغل وتنفضي السجاد كل اما تقع عليه حاجة طبعا بالمكنسة ويلا بسرعة

الديب فريزر
معنديش ديب فريزر بس انا شايفة انه مهم جدا وقريب ان شاءالله هجيبه
دي الحاجات اللي المفروض تكون عندنا وهي بتساعد جدا في انجاز حاجات كتير

من طرف roidaa الإثنين يناير 25, 2010 9:59 am

بصو ده كده هنا علي لسان صاحبه الكلام
هاقولكم شوية حاجات للتوفير

الراجل بيكون سعيد جدا لما مراته تجيب حاجة من فلوس هي موفراها
يعني انا جبت حلل بيركس
وصواني سيلكون
وميزان للاكل
علب للتلاجة
غير الحاجات التانية زي الخزين بتاع البيت وحاجات للاولاد
هنوفر ازاي بقى
تعالي نشوف ايه الحاجات اللي بتوفر
ماترميش اي حاجة يعني البصل كلنا بنجيبه ونخزنه وبعدين يبوظ مننا ويعمل ريحة وحشة
نعمل ايه بقى اولا نحطه في مكان فيه تهوية وياريت ما يكونش فيه شمس زي بلكونة المطبخ او اي مكان على المنور
وتخدي منه في المطبخ شوية ولما يخلصوا تاخدي تاني
والتوم برضة كدة عشان فيه ناس مش بتحب تعمله في الكبة
ساعات كتير بيفضل عندي بواقي فراخ ةلما بتبات بيكون طعمها مش حلو
ممكن اعملها على المكرونة وممكن اعملها شاورمة او كشك او شوربة المشروم بالكريمة يعني اللي بيترمى العضم بس
لو خضار مش عايز يخلص بلاش تحطيها كل يوم خزنيه زي ماهو في اكياس في الفريزر وبعد فترة طلعي كيس منه والباقي بعدين
الخضرة بتاعت السلطة ساعات انا بجيب وجوزي بيجيب وبتبقى كتير
بس برضة مش برميها باعمل ايه اغسلها واصفيها شوية وفي كيس وفي التلاجة بتفضل ممكن اسبوع وبتكون خضرا زي ما هي
لو عندي مكرونة كتير ياما مش بحط عليها كلها
الصلصة واشيل شوية في علبة في التلاجة لتاني يوم واطلعها واغسلها تحت
المية واحطها في الصلصة واسخنها
او لو حطيت الصلصة عليها وباتت باعملها بيتزا بحط عليها كل مكونات البيتزا
زيتون وفلفل رومي وبسطرمة ومشروم واي حاجة تانية وفي الفرن وبتبقى جميلة
وكدة مش هتصرفي كل يوم وهتوفري
وشوية وهاجبلكم افكار تانية

من طرف roidaa الإثنين يناير 25, 2010 10:39 am

ودي مجموعه نساء تعرض ارائهن وترد صاحبه الموضوع عليهن:
*

بسم الله الرحمن الرحيم
اقوم الفجر اخد حمام لازم عشان اكمل يومى واصلى واقول الاذكار واقراء الورد القراءن بتعالى حسب ممكن حزبين المهم
منسبش المصحف مهجور ( ده اتفاق بينى انا وجارتى الحمد لله كان فى الاول
صفحه حتى اصبح حزب حزبين ممكن جزء الله المستعان) واتمنى انكم تكونو معانه
فى زحمه اليوم والبيت نفتكر
المصحف مش بس المصحف فى رمضان زوجى طبعا نزل عشان صلاه الفجر فى المسجد ويذهب الى شغله بعد الفجر
يارب يرزق ازوجنا جميعا المال الحلال بنتى طبعا تكون لسه منمتش تصلى وتدخل تنام وانا اشوف البيت اعمل شويه حجات
ممكن انام تانى لانى مش بشتغل بارك الله فى زوجى مش عايزنى
اشتغل اصحى لو راحه لولدى انزل اقضى اليوم هناك وده كل يومين لو مش راحه اعد على النت شويتين حتى افتكر الغدا
اقول يانى الاكل

وده الرد:
القرآن ده بقى وانا نازلة رايحة الشغل او بعد العصر عشان الصبح باقول الاذكار لحد الشروق واصلي الضحى واكمل الحاجة
والله جميل انك تتفقي مع حد على الطاعة ربنا يكرمكم
هاقول شوية علم نفس الانسان كائن اجتماعي يعني قمة الانجاز لما بيكون حد معانا
وحد يشجعنا مش ننام في الخط

من طرف roidaa الإثنين يناير 25, 2010 10:42 am

وده مثال تاني:

* اهلا بيكو يا جماعة انا بقى
30سنة وموظفة جديدة عندي3اولاد والرابع في السكة شغلي دوامه طويل برجع على
الساعة 6 وجديد عليا الشغل فكل حاجة اتبهدلت
البيت مش قد كده العيال
اهتمامي بيهم قل او انعدم طول النهار بيلعبوا مع بعض يااما على الكمبيوتر
طبعا برجع مرهقة جدا من يوم طوييييييل بالاضافة اني حامل في الاخر ومتعبة
ببقى ادور على السرير حتى جوزي اهتمامي بيه قل
...
تعبت الهدوم في سبت الغسيل مش مطبقه جباال من المكوى عايزاكو تساعدوني انا
بحب شغلي(على فكرة انا مش محتاجاه ماديا الحمد لله ) وبحب بيتي وولادي
ونفسي اوفق بينهم ساااعدوني
ملحوظة انا قبل الشغل كنت انسانة منظمة جدا وكان بيضرب بيا المثل في النضافة
وعلى فكرة الحال مش على طول كده يعني فجأة الدنيا تتكرب وتتكوم عليا والتعب يحل عليا رغم مواظبتي على النظام لكن العيال ربنا يهديهم اللي اعمله يتهد
اوعوا تفكروني مهملة بس يمكن الوضع جديدعليا
وانا في الاول ما قدرش اطلب اجازات او نص وقت بس ان شاء الله ناوية
جوزي كان مش عاجبه اشتغل ودلوقتي مش عاجبه اكتر
بيقول ان الاولاد كده حرام ما فيش عناية ولا تربية وطول النهار هما مع بعض ما فيش توجيه وليه حق على فكره..
هو بيجي متاخر حوالي 11او11.30يعني مافيش امل انه يساعدني ماما بتشجعني وبتقوللي ده في الاول بس وبعد كده هتعود وهقدر اوفق
مش عارفة اصدق واللا لأ
طبعا صعبان عليها مؤهلي عشان من كليات القمة وتعبي في دراستي وبتقول الزمن مش مضمون النهارده مش محتاجة بكرة ممكن تحتاجي
فيعني انت شايفة اني ما سيبش الشغل وفيه امل اصل جوزي عمال يقطمني كل شوية وعايزني اسيبه
معلشي دوشتك

وده الرد:

ربنا يقويكي الساعة 6 دي كتير اوي
انا برجع البيت الساعة2.5 طب انتي بتروحي الساعة كام وشغلك اكيد خاص
اصل لو حكومة كنت هاقولك خدي نص وقت
وبعدين طبعا عشان الوضع الجديد هيبقى محتاج منك مجهود شوية لكن مع الوقت هتتعودي
والحمل ربنا يقومك بالسلامة يس انتي محتاجة شوية تنظيم
يعني الولاد لازم تعوديهم انهم يساعدوكي ودي ياجماعة والله تربية
يعني شرعي كدة الراجل لازم يساعد مراته في شغل البيت
وهي ملزمة بس بتربية العيال
ورسولنا الكريم كان بيقوم البيت ويخيط الثوب رغم كل مشغولياته وفتوحاته ونشره للدين
وطبعا مش هتقدري تغيري جوزك دلوقتي
الحاجات دي لازم ماماته تكون علمتهاله
بس لازم تعلمي اولادك عشان لما يتعبوا في الترويق مش هيبهدلوا
مش كل حاجة علينا كدة احنا بنعلمهم التواكل وعدم تحمل المسئولية
ومتقوليش صغيرين انا اولادي 3 وسنتين والله بخليهم يعملو معايا ولو معملوش مفيش لعب
مش زي ما بشوف الولد ياكل ومامته تشيل ويشرب ويرمي الكوباية
خلليه يروق سريره يكنس الاوضة اللي نام فيها يلم اللعب بتاعته ولو كبير شوية بنزل يجيب حاجة البيت
وبالنسبة للاولاد الكبار خلوهم يوم يمسكوا مصروف البيت والله هيتحمسوا واهو منك بتعوديهم كمان
ومتقوليش دول عيال العيال دي بتفكر احسن مننا ساعات
ومثلا ممكن تخللهم جايزة كل اسبوع اكتر واحد نشيط وساعدك ليه جايزة الحاجة اللي بيحبها واشكريه والاكل اللي بيحبه
وطول الاسبوع اعملي جدول وحطي نجمة لليوم اللي عمل حاجات كتير هياخد النجمة لحد ما الاسبوع ينتهي
وبالنسبالك حاولي تنضفي البيت قبل الولادة يعني مثلا لو هتقدري انتي
واولادك تعملو ماشي او مامتك او اخواتك او بقى تجيبي حد بنضف البيت كله
لحد اما تولدي وتقومي بالسلامة
وبعدين الغسيل وانتي بتلميه طبقيه واكوي حاجة حاجة على ادك يعني اللي هيتلبس بس وربنا معاكي
على فكرة انا ماما هي كمان بتقولي نفس الكلام
لانها مرت بتجربة وحشة فهي كانت بتشتغل في شركة وكانت اخدت وضعها
وبعدين بابا طلب منها انها تسيب الشغل قبل الجواز وفعلا ده اللي حصل
وبعدين حصلت ظروف عند بابا في الشغل وكانت مشاكل واضطرت ماما تشتغل
وملقتش وظيفة كويسة وندمت بعد كدة
وعلى فكرة الشغل كويس انك بتحسي بقيمة الفلوس وبتتعبي عشان تاخديها
وكمان بيوسع مادارك اي حد وتحسي انك مواكبة لحاجات كتير
وبعدين ايام المدارس الاولاد بيروحو المدرسة وهتفضلي قاعدة كدة
بس بصراحة صعبة جدا عليكي وعلى البيت وعلى الاولاد وجوزك كمان حكاية الساعة 6 دي
انا بحط نفسي مكانك صعبة جدا وخصوصا انها جاتلك بعد الجواز والاولاد
بس ما ينفعش نحكم على الحاجة بسرعة لازم تجربة
وبعدين انتي حامل وتعبانة لما تولدي هتقدري تحددي
بس متيأسيش من العيال اهي منها تربية ومنها انهم بيساعدوكي
خلليكي معانا وان شاءالله نلاقيلك حل

من طرف roidaa الإثنين يناير 25, 2010 10:44 am

ويتبع ان شاء الله

من طرف دره مصر الإثنين يناير 25, 2010 10:56 am

مشاء الله موضوع حلو اوى ومشجع يالا مستنياكى تكملى

من طرف نورا نورا الإثنين يناير 25, 2010 11:00 am

فين الصحوة والهمة عايزين كل امرأة عاملة تدخل ونشجع بعض

سيبتي الموضوع وروحتي فييييييييييييييييييييييييييييين

انا بقي شغلي من 9 الي 5

من طرف roidaa الإثنين يناير 25, 2010 11:02 am

لاقيت ده:

هنعمل ان شاء الله برنامج متكامل للسيدة المتزوجه فى بيتها من حيث :

1 - الاهتمام بالناحيه الدينيه
2- الاهتمام بالمنزل
3 -الاهتمام بالناحيه الجماليه والصحيه
4 - الاهتمام بالزوج والاطفال

هنبتدى بالناحيه الدينيه :

- الصلاه في وقتها ولازم وقتها خصوصا الفجر و المحافظه على السنن
- المحافظه على اذكار الصباح (بعد الفجر )والمساء (قبل المغرب )
- المحافظه على صلاه الضحى 4 ركعات والوتر وقيام الليل ولو بركعتين
- البعد عن الغيبه والنميمه وفري حسناتك لك لاتخلى احد ياخذها بارده مبرده
-قراءة جزء على الاقل من القرآن
-سماع الرقيه الشرعيه حصنى بيتك نزليها على الجوال على الاب توب اشرطه
وبغرفتك وغرفه عيالك شغليها وشوفي الراحه النفسيه وتشغيل سورة البقرة فى
البيت على الاقل كل 3 أيام
- صيام الاثنين والخميس من كل اسبوع وصيام الثلاث ايام البيض"13و14و 15 من كل شهر
- ذكر الله طوال اليوم من تسبيح وتهليل وتحميد واستغفار و حولقه
- الصدقه

ثانيا : الناحيه الجماليه والصحيه- سعادة زوجك تبدأ من تظافتك الشخصية,,
ولذلك لا بد من النظافة وخصوصًا نظافة المنطقة الحساسة ,, وهنا السر في
تعلق الرجل بزوجته حتى لو ماكانت حلوة؟؟ وقد تكون الزوجة جميلة ولكن ينفر
منها الرجل؟؟؟ فالسر في النظافة
** إزالة الشعر الزائد من المنطقة باستمرار .
** تغير الملابس الداخلية كل يوم مرة و يمكن أكثر من مرة إذا كان هناك داعي .
** عند كل قضاء حاجة يجب الاستنجاء جيدا بالماء و التنشيف الجيد بفوط التنشيف الخاص لهذا الغرض(قطنية ذات حجم صغير ) .
** غسل الاسنان الصباح وقبل النوم
** طبعا الاستحمام وارتداء الملابس النظفيه مع مكياج خفيف كحل فى العين وروج خفيف وطبعا البرفان وتسريح الشعر
ولازم قبل ما يجى الزوج من الشغل نعمل كدا
** للمحافظه على البشرة نعمل سنفرة مرة فى الاسبوع ونعمل ماسكات للوجه
** العنايه بالقدمين وضع فازلين اوى اى كريم مرطب ولبس الشراب حتى تنعم
ونضع كريم مرطب على اليدين عشان متبقاش زى ايدين الرجاله ****** ودا بعد
من خلص البيت
** العنايه بالشعر نعمل حمام كريم أو زيت مرة فى الاسبوع وممكن نعمل حمام
زيت قبل ما نشتغل فى البيت وبعد من خلص نقوم نشطفه وبكدا هنوفر فى الوقت

- من الناحيه الصحيه والغذائيه** شرب من 6 ل 8 أكواب فى اليوم
**الاهتمام بالغذاء الصحى من الخضر والفاكهه و الحبوب الكامله والاسماك
والتقليل من السكريات والدهون والمشروبات الغازيه والاهتمام بالمشروبات
الصحيه كالشاى الاخضر والتقليل من القهوة والشاى

ثالثا: الاهتمام بالزوج والاطفال

رابعا : الأهتمام بالمنزل

فالمنزل النظيف يعطي راحة لمن يعيشون فيه و حتى زوارهم و لا ننسى أن البيت
النظيف عنوان أهله و ركن أساسي من أركان سعادة أسرتك و قد تجد بعض السيدات
صعوبة في تنظيف منزلها و تعتبره عبئ عليها
فتترك بيتها سكن للأوساخ أو تلحث عمن يتحمل العبئ عنها هذه خطوات سهلة و شيقة لتنظيف و تنظيم المنزل بشكل سهل
بيصبح منزلك غاية في النظافة

برنامج التنظيف اليومي

غرف نوم:

قومي برفع الستارة و افتحي الشباك حتى يتجدد هواء الغرفةاتركي الشمس تدخل لمدة 20 دقيقة
قومي بنفض مفرش السرير اث وتعريض الفرش للشمس (مثل البطاطين والكوفرتات )وترتيبه -اامسحي أطراف السرير بمنشفة مبلولة اوتنظيف المرآة
قومي بنفض الغبار ( مسح ) من على الخزائن و التسريحه و الكمودينات
قومي بكنس السجاد أو البلاط

======================
غرف المعيشه:

قومي برفع الستارة و افتحي الشباك حتى يتجدد الهواء
_ قومي بتنظيف الكتب بنفض الوسائد و تنظيف أطراف الكنب إذا كان من الخشب بمنشفة مبلوله
تنظيف الطاولات و المكتبة و التلفاز و الإكسسوارات الموجودة عليها وشاشه التلفاز والكمبيوتر
_ قومي بترتيب وسائد الكنبة
_ اكنسي الأرض أو السجاد
======================
تنظيف الحمام:

تنظيف المرحاض بالفرشاة والكلور اوأى سائل تنظيف الحمامات مثل هاربيك والبطه و الفلاش
تنظيف الارضيه بالممسحه وتنظيف الحوض
======================
المطبخ:
قومي بغسل جميع الصحون و الأدوات التي قمت باستخدامها للطبخ في فترة انتظارك استواء الطعام
واذا تبقى احضرى طبق كبير وامليه مياة ساخنه وصابون سائل وانقعى فيه كل الصحون والكوبايت والمعالق هيسهل عليكى غسلهم
قومى بتنظيف الحوض بالسلكه بعد الانتهاء من غسيل الصحون
قومى بمسح البوتجاز و جميع اسطح المطبخ وباب الثلاجه
قومى باخراج أكياس القمامه واستبدالها بأخرى
قومى بكنس الأرضيه
======================
برنامج التنظيف اليومي يستغرق ساعة تقريبا

برنامج التنظيف الأسبوعى

غرف النوم:

التنظيم اليومي + تغيير مفرش السرير- مسح جميع الإكسسوارات و أدوات
الماكياج و المستحضرات- مسح الارضيه بماء ومطهر - مسح باب الغرفة - انفظي
الغبره من الشباك بالمنفظه ثم امسحي الزجاج الداخلي و الخارجي بمنشفه
مبلله.

غرفة المعيشة:
التنظيف اليومي + نفض الستائر من الأتربه - انفظي الغبره من الشباك
بالمنفظه ثم امسحي الزجاج الداخلي و الخارجي بمنشفه مبلله.- مسح الباب و
مسح الأرض بماء ومطهر _ تحريك الكنب و التنظيف تحته

الحمامات:
التنظيف اليومي + تغير أرواب وفوط الحمام _ مسح الباب والارضيه بماء ومطهر

المطبخ:
التنظيف اليومى + غسل صفايه الأطباق والمعالق - غسل سله القمامه وتعريضها
للشمس لمدة نصف ساعة تقريبا- غسل فوط التنظيف الخاصه بالمطبخ والبيت كله -

مسح علب البهارات و جميع الإكسسوارات الموجوده في المطبخ - مسح الأرضية - مسح الباب
غسيل الملابس مرتين فى الأسبوع + الكوى
برنامج التنظيف الأسبوعي يستغرق 3 ساعات

برنامج التنظيف الشهرى (التنظيف العميق ) :

غرف النوم:
تنظيف السقف و الجدران بنفض الأغبرة عنها
غسل النوافذ ومسح الزجاج
تنظيف اللمبات و مروحة السقف و جهاز التكييف
تنظيف مفاتيح الكهربا والابواب ومراعاة مسح الحافه العليا والجانبيه فهى سريعا ما تجمع الأتربه والمقابض
ترتيب الملابس فى الدولاب
تنظيف وترتيب الأدراج فى الشفنيرة والكمودينات
تغير مفرش السرير وغسل الستائر
تنظيف السجاد ومسح الأرضيه
تبخير وتعطير الغرفه

غرفة المعيشة

تنظيف السقف و الجدران بنفض الأغبرة عنها
غسل النوافذ ومسح الزجاج
تنظيف اللمبات و النجف
غسل الستائروالمفارش وتنظيف السجاد
تنظيف وترتيب دولاب التلفاز ومسح جميع الانتيكات والتحف واللوحات
تحريك الكنب و التنظيف تحته
مسح الأرضيه والجدران
تبخير وتعطير الغرفه

المطبخ:
تنظيف السقف و الجدران بنفض الأغبرة عنها
غسل النوافذ ومسح الزجاج وغسل الستارة
تنظيف اللمبات ومفاتيح الكهربا
تنظيف البوتجاز من الداخل والخارج
تنظيف الثلاجه من الداخل والخارج
تنظيف جميع الأدوات الكهربائيه ( الشفاط _ الخلاط _ الميكرويوف _ الغساله الخ )
تنظيف وترتيب دولاب المطبخ من الداخل والخارج
مسح علب البهارات و جميع الإكسسوارات الموجوده في المطبخ
مسح الجدران والأرضيه والأبواب

الحمام
تنظيف السقف والجدران و اللمبات من الأتربه
غسل النوافذ ومسح الزجاج
غسل البانيو والحوض وتلميع مرايه الحمام
غسل المرحاض ( قاعدة الحمام ) بالفرشاة ومطهر
تنظيف وتلميع دوش الحمام والحنافيات
مسح الأدوات الموجوده في الحمام
غسل السراميك والأرضيه والباب

المخزن:
غسل الرفوف
تنظيف الأغراض الموجوده في المخزن
إعادة ترتيب الأغراض
غسل الجدران والأرضية

التنظيف الموسمي أو السنوي:

وقته
فصل الربيع وبداية الصيف
طريقته
غسل الملابس الشتويه و وضع حبات النفتالين لحفضها و ترتيبها في مكانها
غسل الأغطيه و البطانيات الشتويه و حفظها في مكانها
غسل الملابس الصيفيه قبل الإستخدام
إصلاح اللآثاث و تجديد الآثاث و دهان المنزل إذا احتاج الأمر
نقل بعض قطع الآثاث لإعطاء ديكور جديد للبيت و اضفاء روح جديده

ملحوظات و نصائح:

ان التنظيف اليومي يسهل عليك التنظيف الاسبوعي
و كما ان التنظيف الاسبوعي يسهل عملية التنظيف الشهري
و يوفر كثير من الوقت و الجهد
الاستيقاظ المبكر يسهل لكى انجاز المهام
استغلى وقتك اثناء الطبخ والتنظيف والترتيب بذكر الله وكسب ملايين الحسنات
قبل النوم قولى أذكار النوم والحمد لله 33 مرة وسبحان الله 33 مرة والله اكبر 34 مرة فهى خير لك من خادم
( صحيح ) وعن علي رضي الله عنه :
أن فاطمة رضي الله عنها آتت النبي صلى الله عليه وسلم تسأله خادما فلم
تجده ووجدت عائشة فأخبرتها . قال علي : فجاءنا النبي صلى الله عليه وسلم
وقد أخذنا مضاجعنا فقال :
" ألا أدلكما على ما هو خير لكما من خادم ؟ إذا أويتما إلى فراشكما فسبحا
ثلاثا وثلاثين واحمدا ثلاثا وثلاثين وكبرا أربعا وثلاثين فإنه خير لكما من
خادم "
لياريت عند نقل الموضوع للمنتديات الاخرى ذكر اسمى قطرة ندى

ياريت أعرف رايكم فى البرنامج واذا كان فيه حاجات ناقصه ومنكم نستفيد

من طرف **ايمان** الإثنين يناير 25, 2010 11:15 am

جزاكِ الله خيرا يا roidaa على النقل المميز

بجد موضوع مفيد جدا

و الافيد اننا نشجع بعض فيه

نقطة التشجيع بتفرق اوى

ربنا يوفقنا لكل ما يرضيه

و متابعين معاكى يا حبيبتى

من طرف مشمشة الإثنين يناير 25, 2010 12:30 pm

جزاك الله خيرا على هذا الموضوع الرائع بس
عارفة نفسى نعمل جدول نمشى عليه يتضمن كل الاهتمامات اللى قولتى عليها من
ناحية دينية و جمالية واهتمام بالزوج والاطفال انا محتاجة قوى ابدأ معاكى
انظم حياتى واعيد تحسين علاقتى ببيتى واولادى وزوجى بعد فترة صعبة قوى من
خلافات مع زوجى واثرت جدا على اولادى بس الحمدلله هحاول اتجاوزها و هبدأ
من جديد ربنا يجازيكى خير على نصايحك المفيدة جدا

من طرف nono الإثنين يناير 25, 2010 12:35 pm

بالنسبة لنقطة التدبير المنزلى دى بقى مهمة جدا
احنا كل شهر بننزل نشترى الخزين بتاع الشهر كله من احد السوبر ماركتات الكبيرة واللى بتعمل عروض كل فترة
والطريقة دى بتوفر معايا كتير
أولا لأنى بأشترى كمية الشهر كله وبالتالى بيكون سعر الكرتونة (اللبن مثلا) أرخص من السعر القطاعى
ثانيا لأن السوبر ماركت بيكون عامل تخفيض على بعض المنتجات اللى أنا برضه محتاجاها
بس لااااااااااااازم نكون كاتبين فى ورقة اللى احنا حنشتريه بالتحديد والا .......!!!!!!
وبعدين لازم اروح يوم العرض والا حالافى العرض خلص
ومع الوقت بنعرف كل محل بيعمل العرض بناعه امتى تقريبا

من طرف roidaa الأربعاء يناير 27, 2010 12:20 pm

بصوا ياجماعه ان شاء الله هابدأبنفسي علشان نشجع بعض كل واحده تقول ازاي منظمه حالها بحيث نتوصل لحلول لمشكلاتنا في التنظيم دي
انا عن نفسي اعترف اني لسه بأبدأ خطوه التخطيط بصراحه
ويمكن اللي هاكتبه هنا هيكون عن اكتر حاجات كلنا محتاجينها وهنجتمع عليها ان شاء الله حسب ظروف كل واحده

اولا كده هوضح لكم اهم الحاجات في موضوع حفظ الاكل في التلاجه او الفريزر
بالتفصيل الممل وزي ماقلت لاهم الحاجات في الاكل اللي بنطبخه يعني
ومنها هنوضح ازاي هنستفيد من الخطوات دي في توفير وقت التسوق وفي نفس الوقت ميزانيه بيتك وزوجك
يعني نضرب عصفورين بحجر واحد ان شاء الله
بس خلوكم معايا.....

يوميات موظفة من البيت للشغل للعيال للزوج طبعا...خليكي معانا

يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا

رد: يوميات موظفة من البيت للشغل للعيال للزوج طبعا...خليكي معانا